प्रोफाईल खबर
“इतिहास भनेको फेरिने चिज हो भाइ, बालेन अहिलेसम्म आएको थिएन,” भन्ने र्यापको पंक्ति केही वर्षअघि काठमाडौंका गल्लीमा गुञ्जिएको थियो। त्यतिबेला यो एउटा जोशिलो युवाको र्याप मात्र जस्तो लाग्थ्यो। तर समयले त्यसलाई नेपाली राजनीतिको यथार्थ बनाइदियो। आज काठमाडौंका सडकदेखि झापाका फाँटसम्म बालेन शाह एउटा नाम मात्र होइन, परिवर्तनको प्रतीक बनेका छन्।
२०७९ को स्थानीय निर्वाचनमा काठमाडौं महानगरपालिकाको मेयरमा स्वतन्त्र उम्मेदवारका रूपमा अप्रत्याशित जित हासिल गर्दै बालेनले नेपाली राजनीतिमा नयाँ सम्भावनाको ढोका खोलेका थिए। महानगरभित्रका अवैध संरचनामा डोजर चलाउँदा धेरैले त्यसलाई लोकप्रियताका लागि गरिएको कदम भनेका थिए। तर त्यो कदमले केवल भौतिक संरचना मात्रै होइन, ‘केही हुँदैन’ भन्ने मानसिकता पनि भत्काएको थियो।
परम्परागत दलका नेतासँग उनले गरेको टक्करले विशेषगरी युवापुस्तामा नयाँ आशा जगायो। बालेन केवल एउटा पदको नाम नभई सुशासन खोजिरहेका युवाको आवाज बने। सामाजिक सञ्जालमार्फत उनले उठाएका प्रश्न र दिएका कडा प्रतिक्रियाले सिंहदरबारसम्म प्रभाव पारे।
देशमा निराशा बढिरहेका बेला युवाहरूको आन्दोलन र परिवर्तनको मागले राजनीतिक वातावरण तातियो। यही परिवेशमा राष्ट्रिय स्वतन्त्र पार्टीले बालेनलाई प्रधानमन्त्रीको उम्मेदवारका रूपमा अघि सारेपछि राजनीति झनै तरंगित बन्यो। उनले सुरक्षित मेयर पद त्यागेर प्रतिनिधिसभा निर्वाचनमा उम्मेदवारी दिने निर्णय गरे, जुन निकै जोखिमपूर्ण मानिएको थियो।
बालेनले उम्मेदवारी दिएको क्षेत्र थियो झापा–५, जुन लामो समयदेखि एमाले अध्यक्ष केपी शर्मा ओलीको बलियो गढ मानिन्थ्यो। दशकौँदेखि त्यहाँ ओलीको प्रभाव कायम थियो। तर यसपटक चुनावले इतिहास बदल्ने संकेत गरिसकेको थियो। बालेन ‘घण्टी’ चिन्ह लिएर झापाको मैदानमा उत्रिएपछि त्यहाँ परिवर्तनको लहर चल्यो।
अन्ततः सार्वजनिक भएको परिणामले नेपाली राजनीतिमा ठूलो मोड ल्यायो। बालेनले ६८ हजार ३४८ मत प्राप्त गर्दै ४९ हजार ६१४ मतान्तरले ओलीलाई पराजित गरे। ओली १८ हजार ७३४ मतमा सीमित भए। यो केवल एक व्यक्तिको जित वा हार मात्र थिएन, पुरानो राजनीतिक सोचमाथि युवापुस्ताले दिएको कडा सन्देश पनि थियो।
३६ वर्षीय सिभिल तथा स्ट्रक्चरल इन्जिनियर बालेनले र्यापरको विद्रोही सोच र प्राविधिक दृष्टिकोणलाई राजनीतिसँग जोड्दै नयाँ शैली प्रस्तुत गरेका छन्। सामाजिक सञ्जाललाई प्रभावकारी रूपमा प्रयोग गर्दै उनले युवालाई संगठित गरे र परम्परागत राजनीतिक संरचनालाई चुनौती दिए।
उनको नेतृत्वमा राष्ट्रिय स्वतन्त्र पार्टीले पनि उल्लेखनीय समर्थन प्राप्त गरेको देखिन्छ। चुनावी परिणामले देखाएको यो लहरलाई धेरैले नयाँ राजनीतिक युगको सुरुवातका रूपमा हेरेका छन्।
बालेनको जितले एउटा सन्देश दिएको छ— नेपाली राजनीतिमा अब नयाँ पुस्ताको प्रवेश र सुशासनको माग बलियो हुँदै गएको छ। “अबको पालो युवाको, अबको बाटो सुशासनको” भन्ने नाराले अहिले देशभर नयाँ बहस सुरु गराएको छ।
